С.МИЯАРАГЧАА Шигшмэл бөхчүүдээс дахин шилдэг нь боллоо

Казахстаны Алматы хотноо зохиогдсон жүдо бөхийн Мастерс тэмцээний эрэгтэйчүүдийн 66 кг-ын жинд монгол бөхчүүд түрүү булаацалдаж, энэ жинд дэлхийд өнгөлдөг гэдгээ батлан харууллаа. 2010 онд БНСУ-ын Сүвон хотноо болсон анхдугаар Мастерст С.Мияарагчаа түрүүлсэн бол өнгөрсөн жил Азербайжаны Бакуд зохиогдсон хоёр дахь тэмцээнд Х.Цагаанбаатар аваргалсан билээ. Ийнхүү жилийн турш үзүүлсэн амжилтаараа шигшигдсэн шилдэг 16 бөхийн тэмцээнд магнайлсан хоёр тамирчин маань хоёул гурав дахь удаагийн тэмцээний шигшээд шалгарч, хэн нь хошой аварга болохоо шийдсэн юм. Дотоодын тэмцээнүүдийн финалд өрсөлдөхийн зэрэгцээ олон улсын тавцанд ч шийдвэрлэх даваанд нэг бус удаа таарч байсан тэдний энэ удаагийн барилдаанд С.Мияарагчаа этэх мэхээр цэвэр ялсан. Read more

А.Энх-Ариун уралдааны салхийг хагаллаа

Залуучуудын өвлийн анхдугаар олимпийн наадмын эхний өдөр Монголын тамирчин, 15 настай тэшүүрчин охин А.Энх-Ариун нэгдүгээр гараанд, нэгдүгээр замаар, нэг номертой уралдлаа. Тэрбээр Беларусийн үе тэнгийн өрсөлдөгч Наталья Храмцоватай өрсөлдөж, түүний хурдыг арай гүйцээгүй ч нийт 16 тамирчнаас 14 байрт орж, ардаа ОХУ, Польшийн тэшүүрчдийг орхисон байна. А.Энх-Ариун Австрид ирэхээсээ өмнө Германы алдарт Инцельд сорилт тэмцээнд оролцож, хамтарсан бэлтгэлээ багш Д.Энхбаярын хамт базаасан юм.

Эмэгтэй, 500 м.

1.Жан Ми (БНСУ) 81,68 2 . Ш и Сяошуань (БНХАУ) 84,32 3.Мартин Брун (Норвег) 87,51 …14.А.Энх-Ариун (Монгол) 94,75

Олимпийн арав дахь эрхийг Н.Баяраа авлаа

Катарын нийслэл Доха хотноо буудлага спортын Азийн аварга шалгаруулах тэмцээн хоёр дахь өдрөө үргэлжлэн явагдлаа. Өнөөдөр манай урт бууны эрэгтэй баг онч мэргэнээ сорьж, багаараа хүрэл медаль хүртжээ. Ганцаарчилсан төрөлд ОУХМ Н.Баяраа шилдэг наймд шалгарснаар олимпийн эрхээ авлаа.

Ийнхүү Монгол улс “Лондон 2012” олимпийн наадмын арван эрх аваад байна. Буудлагын төрөлд өмнө нь Хөдөлмөрийн баатар О.Гүндэгмаа аваад байсан билээ.

ОУХМ Н.Баяраа нь С.Адилбиш багшийн шавь бөгөөд өнгөрсөн онд Хятадын Шеньжень хотноо болсон оюутны Универсиад наадмын багийн төрөлд мөнгөн медаль хүртсэн юм.

Буудлага спортын төрлөөр олимпийн эрх олгодог болсноос хойш эрэгтэй гар буугаар олимпийн эрх авсан анхны тохиолдол энэ болж байгаа бөгөөд өмнө нь ОУХМ З.Батхуяг эмэгтэйчүүдийн урт бууны төрлөөр олимпод өрсөлдөж байсан билээ.

Олимпизм, МакДональдс хорин он хүртэл хамтдаа

1973 оноос олон улсын олимпийн хөдөлгөөнтэй хамтран ажиллаж ирсэн олон улсын түргэн хоолны Макдональдс сүлжээ 2020 он хүртэл гэрээгээ сунгалаа. ОУОХ-ны топ түнш тэд ирэх найман жилд хамтран ажилласнаар 100 сая америк долларыг төлөх юм. Олимпийн түншээр хамтран ажилладаг тэд олимпийн тосгоны хоолны асуудлыг бүрэн шийддэг юм. Лондонгийн олимпод гэхэд 3000 метр квадрат талбай, 1500 суудал бүхий хоёр давхар хоолны танхимыг ажиллуулж, 1,75 сая хоолыг тамирчин, албаныханд хүргэх ажээ.

Уг гэрээг сунгаснаар 2020 он дуустал бүх олимпийн наадамд хамтран ажиллана.

ОУОХ-ны ТОП түнш P&G, Visa, Omega, Dow Chemical, General Electric, Coca Cola компаниуд 2020 он хүртэл гэрээг үзэглээд байгаа юм.

МУГТ Б.СЭР-ОД 12-Р САРЫН ШИЛДЭГ ТАМИРЧИН БОЛЛОО

Монголын Үндэсний Олимпийн Хорооноос тухайн сард болж өнгөрсөн тэмцээн, уралдаанд амжилт үзүүлсэн тамирчдаа алдаршуулах, сар бүр Монголын спортын ертөнцөд болсон үйл явдлыг дүгнэх зорилгоор “Сарын шилдэг тамирчин” төслийг Монголын Спортын сэтгүүлчдийн холбоо, UBS телевиз, Монголын спортын маркетингийн агентлагтай хамтран өнгөрсөн сараас эхлэн хэрэгжүүлж эхэлсэн билээ.

Анхны шалгаруулалтанд амжилтаараа манлайлсан 5 тамирчин өрсөлдөж Боксын ДАШТ-ээс хүрэл медаль хүртсэн МУГТ, Хөдөлмөрийн баатар П.Сэрдамба 10-р сарын шилдгээр тодорсон юм. Харин 11-р сарын шилдэг тамирчнаар Нидерландын Амстердам хотноо болсон Жүдо бөхийн Гран При тэмцээний -78 кг-ийн жинд аваргалсан ОУХМ П.Лхамдэгд мөн тодорсон удаатай.

Тэгвэл 2011 оны хамгийн сүүлийн сар болох 12-р сарын шилдэг тамирчны шалгаруулалт тун өрсөлдөөнтэй явагдаж, Монголын спортын отгон гавьяат марафоны спортын тамирчин Бат-Очирын Сэр-Од шилдгээр анх удаагаа шалгарлаа.
МУГТ Б.Сэр-Од 10-р сарын шилдэг тамирчны шалгаруулалтанд мөн нэр дэвшиж байсан бөгөөд Японы Марафонд 2 дахь жилдээ дараалан түрүүлсэн амжилтаараа ийнхүү 12-р сарын шилдэг тамирчин боллоо. Үзэгч, хөгжөөн дэмжигчдийн санал болох онлайн санал асуулгыг болон комиссын гишүүдын санал асуулгыг тэрээр итгэл төгс манлайлжээ.
Харин 2-р байрт онлайн шалгаруулалтыг сүүлийн өдрийг хүртэл тэргүүлж байсан Ой тогтоолтын ДАШТ-д оролцон хүрэл медаль хүртсэн Монгол улсын шигшээ баг орлоо. Багийн ахлагч Х.Хатанбаатар, С.Цогбадрах, С.Акжол, Т.Мягмарсүрэн нарын бүрэлдэхүүнтэй баг БНХАУ-ын Гуанжоуд болсон ДАШТ-ээс багаараа хүрэл медаль хүртснээс гадна хувийн төрлөөр топ 10-т 4 тамирчин багтаж, 2 тамирчин их мастерийн болзлыг хангасан билээ.

 

Үндэсний эрх чөлөө, тусгаар тогтнолоо сэргээсний 100 жилийн ойд зориулсан хүчит бөхийн барилдаанд түрүүлсэн Монгол улсын аварга С.Мөнхбат, Токиогийн их дуулгаас хүрэл, Жэжүгийн дэлхийн цомоос мөнгөн медалийг 2 өөр жинд хүртэж бахдам амжилт үзүүлсэн Хөдөлмөрийн баатар МУГТ Х.Цагаанбаатар, Монгол Туургатан 2011 шатрын олон улсын тэмцээнд түрүүлж, шатрын их мастер цол хүртсэн Монгол улсын 5 дахь тамирчин болсон Ц.Батчулуун нар энэхүү шалгаруулалтанд нэр дэвшиж өрсөлдлөө.

Дашрамд дуулгахад энэ сарын шалгаруулалтаас эхлэн МҮОХ-ны алтан түнш “РИО ТИНТО” ивээн тэтгэгч-хамтран ажиллагчаар ажиллах болсныг та бүхэнд дуулгахад таатай байна.

П.Лхамдэгд, Г.Мандахнаран “Рио Тинто”-гийн элч боллоо

МҮОХ-ны алтан түнш “Рио Тинто” компани Азийн болон Дэлхийн цом, гран-при тэмцээний аварга, жүдо бөхийн ОУХМ П.Лхамдэгд, Азийн наадмын аварга, чөлөөт бөхийн ОУХМ Г.Мандахнаран нарыг Лондоны олимпийн элч тамирчнаараа зарлалаа. Ингэснээр дэлхийн уул уурхайн тэргүүлэгч групп энэ хоёр тамирчны бэлтгэл, витаминжуулалт, замын болон олимпийн үеэр гарах бүх зардлыг хариуцах ажээ.

Гэрээнд гарын үсэг зурах ёслолын үйл ажиллагаанд БТСГ-ын дарга Ч.Наранбаатар, МҮОХ-ны дэд ерөнхийлөгч Ц.Дамдин, Оюу Толгой ХХК -ийн ТУЗ-ийн дарга доктор Г.Батсүх, Ерөнхийлөгч бөгөөд Гүйцэтгэх Ерөнхий Захирал Камерон МакРей, Олон нийтийн мэдээлэл харилцааны дэд ерөнхийлөгч Дэвид Патерсон нар оролцсон юм. Өмнө нь Оюу толгой ХХК нь Хөдөлмөрийн баатар Х.Цагаанбаатарыг элч тамирчнаараа зарлаж, паралимпийнхантай мөн гэрээ байгуулаад байсан билээ.

12-Р САРЫН ШИЛДЭГ ТАМИРЧИНД НЭР ДЭВШИГЧИД ТОДОРЛОО

 

 

Монголын Үндэсний Олимпийн Хорооноос тухайн сард болж өнгөрсөн тэмцээн, уралдаанд амжилт үзүүлсэн тамирчдаа алдаршуулах, сар бүр Монголын спортын ертөнцөд болсон үйл явдлыг дүгнэх зорилгоор “Сарын шилдэг тамирчин” төслийг Монголын Спортын сэтгүүлчдийн холбоо, UBS телевиз, Монголын спортын маркетингийн агентлагтай хамтран өнгөрсөн оны 10-р сараас эхлэн хэрэгжүүлж эхэлсэн билээ.

 

Хамгийн анхны шалгаруулалт буюу 10-р сарын шалгаруулалтанд амжилтаараа манлайлсан 5 тамирчин өрсөлдөж Боксын ДАШТ-ээс хүрэл медаль хүртсэн МУГТ, Хөдөлмөрийн баатар П.Сэрдамба шилдгээр тодорсон юм.

 

Тэгвэл 11-р сарын шилдэг тамирчны шалгаруулалтыг Нидерландын Амстердам хотноо болсон Жүдо бөхийн Гран При тэмцээний -78 кг-ийн жинд аваргалсан ОУХМ П.Лхамдэгд тэргүүлж сарын шилдэг тамирчны шагналаа гардан авсан билээ.

 

Энэ сарын шалгаруулалтаас эхлэн МҮОХ-ны алтан түнш “РИО ТИНТО” ивээн тэтгэгч-хамтран ажиллагчаар ажиллах болсныг та бүхэнд дуулгахад таатай байна. 2011 оны 12-р сарын шилдэг тамирчинд нэр дэвшигчдийг танилцуулж байна.

 

12-Р САРЫН ШИЛДЭГ ТАМИРЧИНД НЭР ДЭВШИГЧИД

 

Шатрын Их Мастер Цэгмидийн Батчулуун – “Монгол Туургатан 2011” шатрын олон улсын тэмцээнд түрүүлж, шатрын спортын оргил цол их мастерийн болзол хангаж, Монгол Улсын 5 дахь их мастер болсон.

 

 

МУГТ Бат-Очирын Сэр-Од – Японы Марафонд 2 дахь жилдээ дараалан түрүүлж, Монгол Улсын Гавьяат Тамирчин цолоор шагнагдсан.

 

 

Монгол Улсын Аварга Сүхбаатарын Мөнхбат – Үндэсний Эрх чөлөө, тусгаар тогтнолоо сэргээсний 100 жилийн түүхт ойд зориулсан үндэсний бөхийн барилдаанд 7 даван түрүүлсэн.

 

 

Хөдөлмөрийн баатар, МУГТ Хашбаатарын Цагаанбаатар – Японы Токио хотноо болсон “Их Дуулга” тэмцээнээс 66 кг-ийн жинд хүрэл медаль, БНСУ-ын Жэжү хотноо болсон Дэлхийн цомын тэмцээнээс 73 кг-ийн жинд мөнгөн медаль хүртсэн.

 

 

Ой Тогтоолын ДАШТ-д оролцсон Монгол улсын шигшээ баг- БНХАУ-ын Гуаньжу хотноо болсон “Ой Тогтоолын ДАШТ”-д багаараа хүрэл медаль хүртэж, хувийн төрлөөр 3 тамирчин Топ 10-т багтан, 2 тамирчин их мастерийн болзол хангасан.

 

Тэрчлэн өнгөрсөн сард амжилт арвинтай байсан Жүдо Бөхийн Үндэсний шигшээ багийн тамирчдын онцлохгүй аргагүй. БНХАУ-ын Чиндаод болсон Дэлхийн Цомд түрүүлсэн МУГТ М.Бундмаа, БНСУ-ын Жэжүд болсон Дэлхийн цомд түрүүлсэн Хөдөлмөрийн Баатар, МУГТ Н.Түвшинбаяр нар болон нийт медаль хүртсэн, амжилт үзүүлсэн тамирчдадаа баяр хүргэх нь зөв юм.

Дахин сануулахад Сар бүрийн шилдэг тамирчид ирэх сарын эхний долоо хоногт тодрох бөгөөд шилдгийг дараах зарчмаар тодруулдаг

 1.       Онлайн санал асуулга (Вэб хуудас, бусад онлайн хэрэгслээр санал авах) – нийт саналын 50 хувь

2.       Сарын шилдгийг дүгнэх комисс (Хамтрагч байгууллага бүрээс нэг нэг төлөөлөгч) – нийт саналын 50 хувь

 

 

Хүндэтгэсэн:

МОНГОЛЫН ҮНДЭСНИЙ ОЛИМПИЙН ХОРОО

Сочигийн олимпийн бэлтгэлээ “Скай ресорт”-д базаана

Засгийн газрын хэрэгжүүлэгч агентлаг Биеийн тамир, спортын газар, Монголын үндэсний олимпийн хороо, “Скай резорт” ХХК, Монголын цанын холбоо хамтран өвлийн спортыг хөгжүүлэх зорилготой “Сочи 2014” хөтөлбөрийг хэрэгжүүлэхээр болжээ. Уг хөтөлбөрийн гэрээг байгуулах арга хэмжээ өчигдөр Спортын төв ордонд болсон юм.

Ёслолын ажиллагаанд Эрүүл мэндийн сайд С.Ламбаа, БТСГын дарга Ч.Наранбаатар, МҮОХ-ны дэд ерөнхийлөгч Ц.Дамдин, “Скай резорт” ХХК-ийн гүйцэтгэх захирал А.Батсуурь, Монголын цанын холбооны ерөнхийлөгч, УИХ-ын гишүүн Р.Раш нар оролцож, гарын үсэг зурлаа.

Эмэгтэй сагсчдын муугүй эхлэл

Монголын үндэсний олимпийн хороо, Спорт ба эмэгтэйчүүд комиссоос энэ онд санаачилга гарган эмэгтэй сагсан бөмбөгийн спортыг хөгжүүлэх шат дараалсан арга хэмжээг авч, хэрэгжүүлж буй билээ. Энэ хавар улсын аварга шалгаруулах тэмцээнээ хийж, шигшээ багаа бүрдүүлсэн бүсгүйчүүд өмнөд хөршид анхныхаа тэмцээнд оролцлоо. Манай сагсчид Хятадын биеийн тамирын дээд сургуулийн шигшээ багтай тоглосон бөгөөд 70-64-ын харьцаатай хожигджээ.

Монголын эмэгтэй сагсан бөмбөгчид 1994 онд Тайландад олон улсын тэмцээнд оролцсоноос хойш анх удаа хилийн дээс алхаж буй нь энэ бөгөөд 2013 онд БНХАУ-ын Тяньжин хотод болох Зүүн Азийн наадамд оролцож, амжилт үзүүлэх зорилготой байгаа билээ.

 

Ахмад сагсан бөмбөгчдийг шагналаа

Монголын үндэсний олимпийн хорооны Ерөнхий нарийн бичгийн дарга Ж.Отгонцагаан өнөөдөр Монголын сагсан бөмбөгийн холбооны Ерөнхий нарийн бичгийн дарга Б.Дашдорж болон сагсан бөмбөгийн спортын ахмад мастеруудыг Олимпик хаусд хүлээн авч уулзлаа.

МСБХ-ны ЕНБД Б.Дашдорж сүүлийн үед хийж буй ажлаа товч танилцуулсан юм. Энэ үеэр Сагсан бөмбөгийн алтан үеийнхэн хэмээгддэг П.Бямбаа, Б.Туул, Д.Отгонцэцэг, Л.Дашзэвэг, Г.Бадамханд нарыг сагсан бөмбөгийн хөгжилд оруулсан хувь нэмриг нь үнэлж Монголын үндэсний олимпийн хорооны дурсгалын алтан медалиар тус тус шагналаа.

Монголын сагсан бөмбөгийн холбоо нь өнгөрсөн аравдугаар сард дэргэдээ ахмадын зөвлөл байгуулсан бөгөөд ахмаддаа чиглэсэн, ахмадаас туршлага судлах шат дараатай арга хэмжээг авч байгаа юм.

Монголын үндэсний олимпийн хороо Олон улсын олимпийн хороотой хамтран багийн спортыг дэмжих хөтөлбөрийн хүрээнд сагсан бөмбөгийн холбоог дэмжин ажиллаж байгаа бөгөөд 2010 оны Азийн наадамд сагсан бөмбөгийн шигшээ баг хоёр ялж, түүхэн амжилтаа тогтоосон билээ.