2017-02-22

Монголын хоккейчид 2 дахь ялагдлаа амслаа



Азийн өвлийн наадамд өрсөлдөж буй манай хоккейн шигшээ баг хэсгийн 3 дахь тоглолтоо Арабын Нэгдсэн Эмиратын шигшээ багтай хийлээ. Энэ тоглолтонд манай баг 3:6-ын харьцаатайгаар хожигдсноор тэмцээний хоёр дахь хожигдлоо хүлээлээ.

2 дахь өдрөө дараалан тоглолт хийж буй манай баг тоглолтыг тааруу эхлүүлж эхний үед гурван гоол алдсан. 2-р үеийн төгсгөлд довтлогч Б.Цэрэнбалжир манай багийн эхний гоолыг оруулж, тооны харьцааг 4:1 болгосон ч 3-р үеийн эхэнд ахин 2 гоол алдаж хүнд байдалд орсон юм. Тоглолтын төгсгөлд Б.Эрдэнэсүх, Г.Тамир нар гоол оруулсан ч тэр нь хангалттай байсангүй, ялагдал хүлээлээ.

Арабын Нэгдсэн Эмиратын шигшээ баг ингэснээр энэ тэмцээний эхний хожлоо байгуулж байна. Харин манай баг гурван оноотойгоор хэсэгтээ 5-р байрт бичигдсэн хэвээр үлдлээ.

Арабын Нэгдсэн Эмиратын шигшээ баг дэлхийн чансаанд 46-р байрт эрэмблэгддэг бөгөөд дэлхийд чансаатай энэ тэмцээнд оролцож буй 6 багийн нэг гэдэг утгаараа манай багийн хувьд тун хүчтэй өрсөлдөгчид тооцогдож байсан юм.

Манай баг дараагийн тоглолтоо маргааш Хонгконгийн багтай хийнэ. Хонгконгийн баг одоогоор 1 хожилтой тэмцээнээ үргэлжлүүлж байгаа юм.

Холбоотой мэдээ



Олимпийн наадмууд-71




ОЛИМПИЙН ТҮНШ БАЙГУУЛЛАГУУД